Sut beth fyddai parti hunanladdiad siocled rhywun 81 oed? Sut beth yw eistedd yn llonydd am oriau wrth i feistr wrth ei waith beintio darlun ohonoch? Sut fath o nofel fyddai un gan Charles Dickens pe bai wedi’i ysgrifennu heddiw? Mae modd trafod hyn i gyd, a mwy, gyda grwpiau o bobl sy’n hoffi darllen ac sydd eisiau siarad am yr hyn y maen nhw’n eu darllen.
Mae ymchwil wedi dangos fod cymryd rhan mewn grwpiau darllen ar y cyd yn gysylltiedig â medru ymlacio’n well a gwell tawelwch meddwl, canolbwyntio, ansawdd bywyd, hyder a hunan-barch, yn ogystal ag ymdeimlad o gymuned a phwrpas – ac ar ben hynny oll fe gewch chi ddarllen llyfrau newydd bendigedig!
Ydych chi’n rhedeg grŵp darllen ac weithiau’n ei chael yn anodd dod o hyd i rywbeth i’w ddarllen, neu a hoffech chi gychwyn grŵp darllen gyda chriw o ffrindiau ond heb fod yn sicr sut i fynd o’i chwmpas hi? Mae gan y Reading Agency (elusen genedlaethol sy’n helpu pobl i oresgyn heriau mawr mewn bywyd drwy gyfrwng grymus darllen) adran ar ei wefan i’ch helpu i sefydlu a chynnal grŵp darllen, gan gynnwys gwybodaeth am sut i gynnal grŵp darllen ar-lein, ac maent hefyd yn gweithio mewn partneriaeth ag amryw gyhoeddwyr ac yn medru cael llyfrau am ddim mewn swp yn arbennig ar gyfer grwpiau darllen. Maent yn cysgodi’r gwobrau llenyddol mawr i gyd, yn adolygu llyfrau oedolion a phlant, ac mae ganddynt hysbysfwrdd ardderchog ar gyfer popeth sydd a wnelo â grwpiau darllen. I gael rhagor o wybodaeth ewch i https://readinggroups.org/
Os nad yw hynny at eich dant chi, ewch i unrhyw un o’r llyfrgelloedd ym Mwrdeistref Sirol Wrecsam a gofynnwch i’r staff eich helpu i ddethol eich llyfr nesaf neu ateb rhai o’ch cwestiynau am grwpiau darllen. Mae llawer o lyfrgelloedd Wrecsam yn cynnal a chefnogi grwpiau darllen a gallant ddarparu llyfrau i’ch grŵp eu darllen. I gael manylion eich llyfrgell leol ewch i https://www.wrecsam.gov.uk/services/llyfrgelloedd
Os ydych chi’n aelod o grŵp darllen a bod y grŵp yn dymuno dod i un o’n digwyddiadau ni, rhowch wybod inni a gallwn werthu tocynnau rhad i bob aelod ar gyfer unrhyw ddigwyddiad (ac eithrio’r Dirgelwch Llofruddiaeth).
Os ydych chi’n ystyried ymuno â grŵp darllen, pam oedi?
